Praias de Galicia: os datos máis curiosos

Praia de Estaca de Bares. Imaxe de XENERA.

Cada 16 de setembro celébrase o Día Mundial das Praias, unha boa ocasión para que poñamos en valor toda a riqueza que teñen as praias de Galicia. Hoxe imos facer un repaso aos datos máis curiosos das nosas praias, que quizáis ata agora non sabías ou non tiñas demasiado presentes.

Galicia é a comunidade autónoma española con maior cantidade de praias

Sabíalo? Podemos presumir da cantidade de praias que temos, ademais da súa beleza, por suposto. En Galicia hai máis de 800 praias, nas que podemos gozar das augas do Océano Atlántico ou o mar Cantábrico. Concretamente, A Coruña é a provincia de España que máis praias ten, con 411, seguida de Pontevedra, con 374. As nosas praias repártense en ao redor de 1500 km de costa.

En Galicia hai nin máis nin menos que 1 praia por cada 77 habitantes! E é que 73 municipios galegos contan con polo menos 1 areal na súa costa. En canto a concellos, os que teñen máis areais son A Illa de Arousa (64) e Vigo (56), ambos nas Rías Baixas.

A Illa de Arousa. Imaxe de XENERA.

Praias de Galicia con Bandeira Azul

Este ano 2023 das nosas +800 praias, un total de 113 praias foron galardonadas co distintivo de bandeira azul. Isto convértea na terceira comunidade española con máis galardóns deste tipo, só por detrás de Valencia e Andalucía.

A bandeira azul é un distintivo de carácter internacional co que a Asociación de Educación Ambiental e do Consumidor (ADEAC) recoñece anualmente a areais de todo o mundo, seleccionados en base a unha serie de criterios de información e educación ambiental, calidade da auga, xestión ambiental, seguridade e servizos.

O máis en grao sumo en canto a praias galegas

Saberías dicir cal é a praia máis longa de Galicia?

Encabeza o ranking de praias máis longas de Galicia a praia de Carnota (A Coruña), que ten preto de 7 km de longo e máis de 500 m de ancho nalgúns tramos, cando hai baixamar. É unha praia con augas limpas e cristalinas, area fina e branca, situada nas proximidades do Monte Pindo e a popular Fervenza do Ézaro.

A praia de Carnota é unha área natural de gran beleza e interese ambiental. Nela atópase un conxunto único de dunas e pantanos, cunha lagoa interior que alberga flora e fauna de gran interese. O seu valor ambiental é enorme e por iso dispón de diversas proteccións ambientais, como zona ZEPA, Lic e Rede Natura 2000.

Praia de Carnota. Imaxe Turismo de Galicia.

E imos coa pregunta do millón…

Cales son as mellores praias de Galicia? As praias de Galicia máis bonitas?

Xa se sabe que en cuestión de gustos non hai nada escrito. As praias non son unha excepción. Hai quen prefire as praias pequenas e pouco frecuentadas, mentres que outros usuarios valoran que teñan moitos servizos (como chiringuito, duchas, aparcamento amplo…) ou que sexan moi extensas para poder darse un bo paseo pola beira.

Podemos atopar moitos rankings das praias máis bonitas de Galicia e non todos coinciden. Por exemplo, segundo National Geographic as 14 mellores praias de Galicia son as de Carnota, Menduíña en Cangas do Morrazo (Pontevedra), Covas en Viveiro (Lugo), Xilloi no Vicedo (Lugo), Rodas en Illas Cíes, A Lanzada entre O Grove e Sanxenxo (Pontevedra), As Catedrais en Ribadeo (Lugo), Area Maior en Muros (A Coruña), O Vao en Coruxo (Pontevedra), Melide na Illa de Ons (Pontevedra), Laxe en Laxe (A Coruña), Mar de Fóra en Fisterra (A Coruña), Arealonga en Castro de Baroña (A Coruña) e A Frouxeira en Valdoviño (A Coruña).

O que si está claro, é que entre as praias máis famosas de Galicia están estas 3 espectaculares praias galegas:

1. Praia de Rodas en Illas Cíes (Ría de Vigo)

É tamén a praia galega máis coñecida e visitada, especialmente desde que o prestixioso diario británico The Guardian declarou, no ano 2007, que a praia de Rodas en Illas Cíes é “a mellor praia do mundo” polas súas cristalinas augas cor turquesa, a súa area branca e fina e os bosques e dunas que chegan ata os areais.

A Praia de Rodas é a máis grande e importante do arquipélago das Illas Cíes, na Ría de Vigo, con máis de 1 km de lonxitude.

Praia de Rodas. Imaxe Mar de Ons.

2. Praia das Catedrais en Ribadeo (Lugo)

O nome real de a praia é Augas Santas, pero os seus característicos arcos (de máis de trinta metros de altura), que lembran aos arbotantes dunha catedral, fan que se fixese famosa como Praia das Catedrais.

Realmente, máis que unha praia trátase dunha auténtica obra de arte. É unha das praias máis bonitas de Europa, que sorprende aos visitantes polos arcos, cúpulas e agullas de pedra que o mar, o vento e o paso do tempo foron esculpindo. Por iso, é tamén coñecida como “a catedral do mar”.

Para poder visitala hai que ter en conta as horas de marea baixa. Ademais, do 1 de xuño ao 30 de setembro e en Semana Santa é necesario realizar unha reserva gratuíta previa para poder visitala, por cuestións de aforo e coidado ambiental.

Praia das Catedrais. Imaxe de XENERA.

3. Praia A Frouxeira en Valdoviño (A Coruña)

As praias de Valdoviño son moi populares en Galicia, sendo A Frouxeira a máis valorada. Non só pola beleza da súa paisaxe, senón porque desde tempos remotos ten fama de ser curativa. As súas augas son moi ricas en iodo e a súa area branca e fina esténdese por máis de 3 km de lonxitude. Preto atópase a lagoa da Frouxeira, un humidal de gran valor ambiental, que serve de refuxio a moitas especies de aves.

Nesta praia a forte ondada e o vento son compañeiros case asegurados. O Atlántico adoita sacudir con forza, o que a fai, se cabe, máis espectacular e un lugar perfecto para a práctica de deportes acuáticos, como o surf ou o bodyboard.

Praia A Frouxeira. Imaxe Turismo de Galicia.

As praias máis “guau” de Galicia

Tendo en conta que máis dun 26% de fogares teñen can, hai unha parte importante da poboación que ten interese en ir á praia en compañía do seu compañeiro de catro patas.

Do 1 de xuño ao 30 de setembro non é posible levar can ás praias galegas, fóra dunha decena de praias caninas, nas que si se admite a entrada de cans en tempada estival.

Ademais, o próximo verán (de 2024) os cans poderán ir a tódalas praias de Nigrán -mesmo en tempada estival- se o fan entre as dez da noite e as nove da mañá. Esta decisión tomouse trala primeira consulta pública ao respecto, que se pechou cun 74,2 % dos votos favorables á entrada dos cans ás praias de Nigrán nese horario.

A praia galega máis negra

A pouca distancia de San Andrés de Teixido e en plena Serra da Capelada atópase unha das praias máis singulares do mundo. Trátase da praia de Teixidelo, situada concretamente na parroquia de Régoa, en Cedeira (A Coruña). É posiblemente a única do mundo cuxa area negra non é de procedencia volcánica. É tamén a única praia de area negra na comunidade galega e un recuncho realmente sorprendente e salvaxe, debido ao seu difícil acceso. Aínda así é posible facer o roteiro ata ela por libre ou acompañados dun guía.

#Galifornia

Non podiamos pechar este post sobre as praias galegas sen mencionar “Galifornia”. Seguro que oíches nalgunha ocasión este termo. Desde hai uns anos, especialmente no verán, utilízase esta palabra para comparar Galicia con California, facendo alusión a que as praias galegas non teñen nada que envexar a Venice Beach. O termo, inicialmente, facía referencia ás praias da zona da ría de Vigo, pero o seu uso acabou estendéndose a toda Galicia.

En Instagram, xa hai case 1 millón de publicacións co cancelo #Galifornia e non nos extraña. Como non imos presumir das nosas praias!

E ti, presumes das praias de Galicia? Cales son as praias galegas que máis che gustan e por que?