Durante as túas vacacións podes reducir considerablemente a factura da luz. Só tes que ser un pouco previsor e aplicar certas medidas antes de saír de casa. Bota unha ollada aos consellos que che propoñemos para evitar que a túa vivenda siga consumindo máis electricidade da necesaria cando está baleira.
Con estas pautas, conseguirás reducir o importe da parte variable da túa factura da luz, que é a que se corresponde coa enerxía consumida.
Que facer co frigorífico?
Planifica as túas comidas pouco antes de que cheguen as túas vacacións para tratar de deixar o frigorífico baleiro e poder desconectalo. Pode que che pareza complexo ter que consumir todos os produtos, pero merece a pena. Ten en conta que este electrodoméstico é o que máis consome, en torno ao 30% da electricidade da túa vivenda. É importante que baleires a neveira e deixes a porta totalmente aberta para evitar os malos cheiros e a proliferación de mofos.
En stand-by tamén hai consumo de electricidade
O modo en repouso ou stand-by dalgúns electrodomésticos e dispositivos electrónicos pode supoñer entre o 2 e o 11% do teu gasto de luz anual. Este consumo “silencioso” pode evitarse desconectando por completo todos os aparellos que o teñan. Neste sentido, debemos destacar que os aparellos en modo repouso ou stand-by non son só os de piloto vermello, senón que tamén hai outros, como o de aire acondicionado, que consomen electricidade ao estar enchufados, aínda que non estean activos.
Desenchufar os aparellos eléctricos e electrónicos con modo en repouso antes de saír de casa é un bo hábito xa non só para o momento en que che vas de vacacións, senón tamén no teu día a día.
O stand-by creouse para que resultase máis rápido acender algúns electrodomésticos que necesitaban un quecemento previo, como o televisor. Actualmente utilízase en todo tipo de dispositivos. Os aparellos tecnolóxicos non só usan este modo para acenderse máis rápido, senón que ademais están conectados permanentemente a Internet para descargar en segundo plano, como ocorre coas consolas, ou emitir notificacións, como sucede cos smartphones e tablets.
Entre os electrodomésticos que máis consomen en modo stand-by atópanse os televisores, consolas, decodificadores TDT, discos duros, aparellos de aire acondicionado, computadores e impresoras.
Existen enchufes intelixentes, que se apagan cun mando a distancia, evitando que teñas que agacharche ou acceder á parte de atrás dos mobles para desconectalos.
Máximo aforro desactivando o cadro eléctrico
Se queres que a redución do consumo eléctrico do teu fogar mentres estás de vacacións sexa máxima, ademais de baleirar o frigorífico, apaga os chumbos antes de irte de casa. Así terás a garantía de que o consumo eléctrico dos aparellos do teu fogar durante o teu período vacacional é cero.
Cóntanos, tomas estas ou outras medidas para reducir o teu consumo de electricidade mentres estás de vacacións?